Neytendahornið - "Betra bak" tekið í bakaríið.

 

Fyrir 6 árum síðan þurfti ég að fjárfesta í nýju rúmi.  Verslunin Betra bak hafði auglýst og auglýst og sakleysinginn ég beit á agnið hjá þeim.  Eftir að hafa skoðað allnokkur rúm í versluninni festi ég kaup á hjónarúmi fyrir 165 þúsund krónur.  Það átti að hafa þann stóra kost að hafa harða brík á öllum köntum þannig að maður gat sest á það án þess að síga mikið niður.

Nýja rúmið var sent heim.  Fljótlega tók ég eftir því að það var miklu betra að sofa öðru megin í rúminu.  Hinu megin var einhvers konar hola.  Ástæðan var sú að á einni hlið rúmsins hélt bríkin ekki.  Það var m.ö.o. hörð brík á öllum köntum nema einum.

Ég hringdi mörgum sinnum í verslunina til að segja farir mínar ósléttar.  Fékk ég þau svör að bráðlega væri von á dönskum sérfræðingi í heimsókn þannig að best væri að ég sendi þeim rúmið og þá myndi sá danski yfirfara það og ég fengi það síðan bætt.  Og þetta gerði ég.

Fór í kjölfarið til Reykjavíkur og heimsótti "Betra" bak.   Sölumaður tók á móti mér, fullyrti að ég fengi rúmið bætt um leið og danski sérfræðingurinn kæmi og bauð mér annað rúm.  Ekki hafði ég áhuga á samskonar rúmi.  Endaði þessi ferð mín á því að ég keypti annað rúm og greiddi fyrir það 185 þúsund en fékk 80% af verði fyrra rúms til frádráttar.  Þeir lofuðu mér því að ég fengi 20% greidd um leið og sá danski kæmi. 

.

 

. 

Leið svo og beið.  Ég gerði mér aðra ferð í höfuðborgina og heimsótti verslunina að nýju.  Rúmið mitt var þá komið í sýningarsalinn og einhver stráklabbi tók á móti mér.   Danski sérfræðingurinn sást hvergi.  Stráklabbinn lagðist í 5 sekúndur í rúmið og sagði;  "Það er bara allt í góðu lagi með þetta rúm".  Þarna var komið allt annað hljóð í strokk Betra-baks-manna.  Stráksi sagði með yfirlæti þess sem allt veit;  "Sko ef eitthvað er að þessu rúmi, þá eru hinar þrjár hliðarnar OF HARÐAR"

Dísuss !

Ég fullyrti að rúmið væri gallað þar sem ein bríkin væri of mjúk.

Þeir neituðu að rúmið væri gallað af því að ef eitthvað væri, þá væru hinar 3 hliðarnar of harðar.

Strák-skunkurinn hagaði sér dónalega við mig og lét eins og ég væri kjelling sem gengi um veröldina og kvartaði yfir öllu sem nálægt mér kæmi.  Með hörku hélt ég reiðinni í skefjum og fékk þá til að samþykkja að hlutlaus aðili tæki rúmið út.  Maður frá Neytendasamtökunum.

Í næstu ferð minni til Reykjavíkur, skömmu síðar, fer ég inn í Betra bak og ætla að sýna vinkonu minni gallaða rúmið.  Þá er það horfið.  Ég spyr sölumann hvar rúmið sé að finna ? 

Svarið sem ég fékk var að þeir seldu rúmið mitt - sem átti að skoðast af hlutlausum aðila - til einhvers sumarbústaðaeiganda á 80% verði.  

Niðurstaða málsins var sú að ég keypti rúm á 185 þúsund og greiddi auk þess 20% af öðru rúmi.  Þeir tóku af mér réttinn til að fá hlutlausan aðila til að meta rúmið.  Þeir lugu að mér.  Þeir komu fram við mig eins og ég væri kvörtunarskjóða dauðans.  Þeir töpuðu ekki einni krónu á gallaða rúminu.

LÚÐAR ! 

 

.

 

 

 

Athugasemdir

[Edda Agnarsdóttir, 13.9.2008 kl. 09:00]

Ég hef aldrei farið inn í "Betra bak" og geri það aldrei eftir þessa sögu! Hef alltaf haft einhverja skrýtna tilfinningu gagnvart þessu fyrirtæki, það fór af stað með þá allra mestu greddu sem ég hef upplifað með eitt fyrirtæki og er en gratt!

Ég vona bara að það verði tekið úr sambandi  eða fari í kalda sturtu á hverjum morgni. 

[Gulli litli, 13.9.2008 kl. 09:00]

illt er að heyra....skamm skamm Betra bak...

[Einar Indriðason, 13.9.2008 kl. 09:21]

Hmm... Ef þetta er sama búð og er fyrir neðan Hótel Esju í Reykjavík... þá get ég bætt við sögu, sem tja... styrkir mig alla vega í því að fara ekki þangað aftur.

Mig vantaði rúm fyrir nokkrum árúm.... búinn að skoða hér og þar, en átti þessa búð eftir.  (Rúmbúðina fyrir neðan Hótel Esju.)  Ég labba inn, enginn að afgreiða.  Ég set upp minn besta "hæ, ég er kúnni og mig vantar afgreiðslu.  Takk." svip, og bíð aðeins.  Enginn að afgreiða.  Ég ranghvolfi augunum með sjálfum mér, fer yfir mig aftur, og stilli mig aðeins betur... reyni svona að útgeisla frá mér... "Afgreiðsla takk!"..... Ekkert svar.  Hvort þær voru 5 eða 10 mínúturnar sem ég ranglaði þarna um án aðstoðar... en út fór ég, og keypti mitt rúm annars staðar.

[Anna Einarsdóttir, 13.9.2008 kl. 09:29]

Betra bak er í Skeifunni..... við hliðina á dótabúð...aðeins norðar en Hagkaup.

En talandi um þetta;  Ég þekki dæmi um strák og stelpu sem hófu búskap mjög ung.  Þau voru ca. 16-17 ára og ætluðu að kaupa sér hjónarúm.  Fóru inn í Húsgagnahöllina og lögðust í einhver rúm.  Þá kom afgreiðslumaður og sagði; 

"Krakkar mínir, þið eigið ekki að leika ykkur hérna, veriði úti". 

[Einar Indriðason, 13.9.2008 kl. 09:44]

Óh.  Þá kveiki ég.  Ég heimsótti þá Betra Bak líka, og var að skoða Tempur dýnur.  Var ekki alveg að virka á mig á þeim tíma.

Varðandi krakkana... það hefði nú orðið enn vandræðalegra ef þau hefðu farið að "leika" sér þarna!

(en... sko...  Ef krakkarnir hefðu ætlað í raun og veru að kaupa rúm, þá hefði ekkert verið að því að prófa rúmin, jafnvel þó þau hefðu þurft að sannfæra afgreiðslumanninn... :-)

[Bergljót Hreinsdóttir, 13.9.2008 kl. 11:01]

Isspiss...ljótt að heyra...en gott að vita að maður geti þá bara sleppt því að eyða tíma sínum þarna...

Ég keypti mitt dásamlga rúm hjá þeim í Svefni og heilsu og fékk frábæra þjónustu...dýnan sem ég vildi var ekki til. en ég fékk aðra dýnu á meðan þeir pöntuðu hana.....og að auki lak á rúmið og sængurvföt....

Þegar rétta dýnan kom mættu þeir heim til mín og skiptu sjálfir...algjör snilld...

Mæli með Mattanum og hans fólki....

[Hrönn Sigurðardóttir, 13.9.2008 kl. 14:07]

Lúðaleppar!! Hefurðu talað við neytendasamtökin?

[Anna Einarsdóttir, 13.9.2008 kl. 14:31]

Það munaði hársbreidd - og þá erum við að tala um þunnt hár - að ég færi í mál við Bak-lúðaleppana ...... en svo nennti ég ekki að eyða orku minni í það.

Það er svo margt miklu skemmtilegra. 

[Lilja Guðrún Þorvaldsdóttir, 13.9.2008 kl. 17:34]

Þetta er ljótt að heyra, en þessu mun ég aldrei gleyma. -  Þvílík ósvífni !.,  en það versta er,  að þeir sem eru ósvífnastir, skuli alltaf komast upp með svona kaupmennsku,  eins og þetta dæmi sýnir. -  Þeir selja semsagt gallaða  rúmið aftur á 100% prósent verði,  þ.e.a.s. þú greiðir 20% af þinni elskusemi og kurteisi, - og nýji kaupandi gallaða rúmsins fær 20% afslátt og greiðir þ.a.l. 80% af fullu kaupverði svo þeir hjá "Betra bak" græða á þessari svívirðilegu framkomu og dónaskap. - Þetta er alveg með ólíkindum.  - En er ekki 15 til 20 ára ábyrgð á þessum rúmum ég man ekki betur.

[Ragnheiður , 13.9.2008 kl. 19:45]

Úpps..ég á rúm frá þeim og er voðalega ánægð með það en það getur verið vegna þess að ég er með svo góðan félagsskap í því !

Ömurlegir viðskiptahættir þetta

[Birna Dis Vilbertsdóttir (IP-tala skráð) 13.9.2008 kl. 22:41]

Ömulegt

[Guðrún Jóna Gunnarsdóttir, 14.9.2008 kl. 09:28]

Lúðar eru réttnefni. Þvílíkur hroki!  Því miður eru viðskiptahættir sem þessir ansi algengir. Neytendur þurfa stöðugt að vera á tánum í einu og öllu til að verja og tryggja rétt sinn. Persónulega finnst mér að Neytendasamtökin mættu vera öflugri, menn etv. orðnir of samdauna þar á bæ??

Hef sjálf heimsótt umrædda verslun í sömu erindagjörðum, þ.e. að versla mér rúm. Mér fannst ágengnin það mikið og verðið of hátt þannig að ég gekk út og kem ekki til með að heimsækja hana aftur, að öllu óbreyttu.

Flott að láta vita af þessum viðskiptaháttum, það mættum við fleiri gera!

[Brjánn Guðjónsson, 14.9.2008 kl. 18:36]

ljótt að heyra. annars þarf ég líklega engar áhyggjur að hafa, þar sem ég er svo mikill þverhaus að ég versla ekki við fyrirtæki sem kunna ekki einu sinni að fallbeygja eigin nöfn, í auglýsingunum sínum.