Þú hefur verið blekkt/ur.

 

Maður á að miðla af reynslu sinni.

Nú vill svo til að ég er kona með reynslu af höfuðhöggi.

Þar með vil ég koma því á framfæri að það er bara plat að fólk sjái stjörnur við þessar aðstæður.

Ekki ein einasta stjarna. 

 

 

Sex spor.

 

Ég vann ferðina til Vestmannaeyja og hún varð vendipunktur í mínu lífi.  Í sakleysi mínu var ég að dansa þegar kona dettur beint fyrir aftan mig og kippti undan mér fótunum þannig að ég flaug á hnakkann og úps !!!  GAT á hausinn minn.

Þá komu þrjár löggur og handtóku mig.  Það var frekar gaman.  Löggan keyrði mig á spítalann.  Síðan var stefnumót við lækninn sem því miður var kvenkyns.  Já, maður fær ekki öllu ráðið.  Ekki á óskalistanum.  Jæja, daman setti sex spor í hausinn á mér og núna er ég sem ný.   

Í gær tróð ég svo upp með Árna Johnsen.  Hann kom og spilaði fyrir okkur kjellurnar.   Ég hafði fjárfest í gítar einum, fyrr um daginn.  Svona pínulitlum gítar en samt nógu stórum til að  taka lagið með stráknum.  Núna erum við búin að stofna dúett - eða hljómsveit.  Allir sem eru fúlir út í strák fyrir þjófnað, hætti því strax.  Kallinn er húmoristi og þá má hann eiginlega allt.  Það er bara þannig.  Skemmtilegur kall. 

Eigum við að kjósa aftur ?

Glæsileg verðlaun.

 

Í tilefni af tuttuguþúsundustu flettingunni á bullinu, verða nú veitt vegleg verðlaun.

 

Hinn heppni hlýtur ferð fyrir einn til Vestmannaeyja í fyrramálið.  Innifalin er hótelgisting í tvær nætur, skoðunarferðir, veislumatur, hellaskoðun og eintóm gleði.

 

 

 

 

Og sá heppni eeeeer..... trommusóló, bomm bomm bomm......    ANNA EINARSDÓTTIR !

Þvílík endemis lukka. 

Bloggvinabálkur....

Svampur Sveinsson ægilegur

en stundum var hann þægilegur

oft kerlingar frusu

er fengu á sig gusu

mér fannst kauði hlægilegur.

 

 

Hugarfluga fallegt fljóð

finnst mér vænt um hana

á hún skilið ástarljóð

er prýði meðal svana

 

 

Sæmundur er gamall granni

gat hann alveg teflt

segi því með fullum sanni

sá hafi andann eflt.

 

 

Gillí frænka er ferlega klár

og fyndin,  ættgengt mun það vera.

Ég vona að hún lifi í 100 ár

því endalaust er hún gott að gera.

 

 

Jenný mín hún bloggar margt

mig setur hún á gat

pistlar fjórir fyrripart

og fimm svo eftir mat

 

 

Af bloggvinum á Heiða hauga

en hefur engan mann.

Gæskan er með glóðarauga

hver gaf henni á´ann ?

 

 

Ef ég Eva hitti þig

er geng ég niður veginn

skaltu kjella knúsa mig

og kyssa báðum megin

 

 

Bratti ég lofa litlu kvæði

því ljóðelskur karlinn er

maðurinn er algjört æði

í uppáhaldi hjá mér.

 

 

 

 

 

 

 

 

 

 

 

Fann dóna !

 

Hér er það netlögreglan sem ritar.

Í dag kom ég upp um dóna. 

Ég var að leita að ákveðnum aðila á blogginu í dag og tek það fram, svo ekki komist af stað einhver útbreiddur misskilningur, að maðurinn er líklega á sjötugsaldri, frekar en áttræðis.  Áhugi minn á honum var altså bundinn við hans bundna mál. 

Jæja,  þar sem ég mundi bara fyrra nafnið mannsins sem ég leitaði og hann er ekki einn af mínum bloggvinum, smellti ég mér í bloggleit.  Það leiddi til þess að ég datt alveg óvart inn á nýstofnaða klámsíðu.  Ojojojoojjjjj.  Svona gera menn bara ekki.

Ég auðvitað skoðaði hana vel og vandlega til að vera viss um að þetta væri klám en ekki erótík.    Ekki var um að villast.  Þá sendi ég póst á mbl-stjórann og var augljóslega fyrst með fréttirnar.   Ekki fékk ég nú fundarverðlaun eða neitt svoleiðis.  Núna er ég að reyna að láta ekki valdið stíga mér til höfuðs. 

 

Vinkona mín.

 

 

Besta vinkona mín fór í heilaskanna um daginn og þeir fundu ekkert.  Já, trúið mér bara, þeir fundu AKKÚRAT EKKERT !   Ekki eina baun.

Við erum ekkert smá mikið búnar að hlægja að þessu, vinkonurnar.      Við erum þá ekki að hlægja að henni.  Nei nei,  það er bara mesta furða hvað stelpan er, miðað við tómahljóðið í höfði hennar. 

Fyrir mig er málið öllu verr vaxið.  Að ég skuli hafa átt bestu vinkonu í 30 ár og aldrei tekið eftir því að hún er með EKKERT í kollinum, er vissulega áfellisdómur yfir dómgreind minni. 

 

 

Ég er örugglega ljóska inn við beinið.  

 

 

Ábót á róbótasögu.

 

Þegar ég átti afmæli síðast, gaf mamma mér sóp-róbót í afmælisgjöf.  Það gerði hún líklega af vorkunsemi við mig.  Ómögulegt að dóttirin þurfi alein að sjá um öll húsverkin.  Enda kom það á daginn að ég var hæstánægð.  Mér fannst svo heimilislegt að hlusta á "kallinn" minn sinna húsverkunum meðan ég lá í baði og svoleiðis.  

Já, ég var ánægð í einhvern tíma.  Síðan lá leið mín til Reykjavíkurhrepps.  Í Kringlunni sá ég aðra tegund af sóp-róbót.  Sá var þeim eiginleikum gæddur að hann ekki bara sópaði rusli og ló saman, hann ryksugaði beinlínis allt upp.   Ó ó !  Ekki get ég nú sagt að mamma hafi haft mikinn metnað fyrir dótturinnar hönd.    

Hún gaf mér VERKAMANNA-SÓP-RÓBÓT !  En þarna sá ég VERKFRÆÐINGS-SÓP-RÓBÓT. 

 

MAMMA !!!   Hvað ertu að pæla ! 

LEIKUR... og hættiði svo að tuða um flokkunina !

 

Í gær fór ég í Laugardalshöllina og sá strákana mína  vinna Serbalufsurnar.    Það var sko enginn vandi.  Eitthvað var farið að hitna í hamsinum á fólkinu því allir voru komnir í sandala og ermalausa boli.  Ég fór reyndar úr mínum bol en var svo heppin að vera í öðrum innanundir.  Þið hefðuð átt að sjá vonbrigðin á ásjónu gæjanna fyrir aftan mig þegar sú staðreynd blasti við þeim.    Greyin,,  alltaf að tapa. 

Í fyrri hálfleik hvatti ég strákana mína ;

"Ísland" klapp klapp klapp og "Áááááfram Ísland" klapp klapp     klapp   klapp klapp.  Það var alveg sama hvað ég hrópaði, ég heyrði ekki einu sinni í sjálfri mér, hvað þá að mér hafi dottið sú vitleysa í hug að strákarnir heyrðu Íslandið mitt. 

Hins vegar kom annað hljóð í litla kroppinn í síðari hálfleik.  Þá varð ég svo æst eitthvað að ég orgaði eins og ljón.  Uppgötvaði þennan líka fína barítón í sjálfri mér.    Held að það hafi verið þá sem við sigldum framúr lufsunum og náðum sex marka forskoti.

Nú er næsta skref að sækja um inngöngu í karlakórinn Heimi og karlakór Hreppamanna til vara.  Þar á ég væntanlega eftir að slá í gegn á ýmsum sviðum. 

 

 

Anna, Þór og Heiður.

 

Ég hef aldrei getað skilið af hverju mér er alltaf kennt um þegar fólk hefur ekki tíma.

 

"Nei, ég hef ekki komist í þetta vegna anna."

 

 

Það eru heldur ekki sældardagar hjá Þór greyinu, löggan tekur hvern einasta ökuÞór sem á vegi þeirra verður.

 

 

Svo minnist maður ekki ógrátandi á Heiði.

Hversu margir hafa ekki sagst hafa farið uppá hana ?

Snjall kall.

 

Tveir félagar voru á gangi niður Laugaveginn.  Skyndilega kemur ræningi og heimtar alla peningana þeirra.  Þeir byrja að tæma vasa og telja uppúr veskjum sínum.  Rétt áður en þeir afhenda féð, snýr annar sér að hinum, réttir honum tíuþúsundkall og segir:  "hérna er það sem ég skuldaði þér".