Æskuminningabrot.

 

 

Sæmundur bloggvinur minn og fyrrum nágranni, kom með skemmtilega sögu af syni sínum og bróður mínum.  

.

Bróðir minn:  "Pabbi fór niður í Straumfjarðará og veiddi svo stóran lax, að hann gat ekki lyft honum".

Sonur Sæmundar:  "Iss" !  "Það er nú ekki mikið.  Pabbi fór að veiða upp í Baulárvallavatni og veiddi þrjá stóra silunga og tvö skrímsli".

.

Að alast upp með þessum strákum, var alveg ómetanlegt.  Oft bakaði ég drullukökur á þessum árum.  Stundum fór ég til mömmu og bað um smá sykur og kakó.  Ef vilyrði fékkst fyrir því, setti ég herlegheitin saman við mold og vatn, formaði fallega köku sem ég skreytti síðan með Sóleyjum eða Fíflum.  Svo borðuðu strákarnir kökuna.     Ekki veit ég til að þeim hafi nokkurn tíma orðið meint af því.

.

Við gerðum ýmsar tilraunir á þessum árum.  Ég man að við settum kindaspörð í Opalpakka og buðum gestum og gangandi.  Einnig pissaði ég einhvern tíma í Sinalco flösku og bauð sopa.

.

 

Við krakkarnir fórum snemma að stunda viðskipti ýmiss konar, þar sem við vorum svo heppin að búa við hliðina á veitingastað/verslun á Vegamótum.  Nánast daglega, á sumrin, stoppuðu rútur þar, fullar af útlendingum.   Það kom oft fyrir að útlendingarnir gáfu okkur pening, sökum þess að klæðnaður okkar minnti helst á aumingja.  Við vorum fljót að sjá að það borgaði sig að vera illa til fara.  Ef það dugði ekki að standa þarna með aumingjasvip,  týndum við Fífla og Fífur og seldum útlendingunum.  

Gróðinn fór undantekingalítið í sælgætiskaup.

.

Þrátt fyrir að búa ekki á sveitabæ, var dýralífið fjölskrúðugt hjá okkur.  Heima hjá mér voru kettir og hænur.  Sæmundur nágranni átti Lassýhund.  Oft lékum við okkur með mýsnar, bjuggum til holu handa þeim og gáfum þeim að borða.  Þær hins vegar drápust oftast, að ég held úr hræðslu.  Kindurnar í Straumfjarðartungu voru sko ekkert venjulegar kindur.  Við stunduðum það að gefa þeim matarkex.  Þær voru æstar í matarkex.   Það kom oft fyrir að kindurnar örkuðu inn á Vegamót, ef útidyrahurðin stóð opin.  Skemmtilegur svipur sem kom alltaf á ferðafólkið, þegar það fór á klósettið og mætti rollu á leið út af klósettinu. 

.

Sökum þessarar ágengni kindanna, voru sett skýr fyrirmæli um að passa alltaf að loka "sláturhúsinu".  Sláturhúsið hafði einu sinni verið sláturhús og nafnið var pikkfast á húsinu þrátt fyrir að á þessum tíma hafi húsið hýst lager.  Á lagernum var geymt allt gos og sekkjavara.  M.a. kögglar sem kindurnar voru sólgnar í.  Það kom einu sinni fyrir að rolla lék á mig.

Hún hlýtur að hafa falið sig á bakvið goskassana og beðið þar til ég er farin.  Þá fer hún og étur köggla, viðstöðulaust, þar til einhver á leið í sláturhúsið næst.  Þegar að var komið, var rollan orðin svo útþemd að það var vandkvæðum bundið að koma henni út um dyrnar.  Mig minnir þó sterklega að hún hafi lifað kappátið af.  En ég skammaðist mín.

.

Við lékum okkur líka mikið við frændfólk mitt frá Dal.  Einu sinni sáu þau, í kíki held ég, að sveitungi okkar einn hafði hægðir á holti einu.  Eftir það var holtið aldrei nefnt annað en Dritholt.  

.

Systir mín er fædd á Jóladag.  Þegar ég var lítil, spurði ég hina krakkana: 

"Verður hún þá Jesú þegar hún verður stór" ? 

.

Já, svona var maður nú vitlaus einu sinni. 

 

 

Athugasemdir

[Bjarndís Helena Mitchell, 12.8.2007 kl. 12:57]

Hva, ætli stelpan hafi ekki kunnað á trekt? Skemmtileg lesning og gaman af svona grallarasögum.

[Ingibjörg Friðriksdóttir, 12.8.2007 kl. 13:58]

Kristjana, hún notaði trekkt.  Það var alsiða að nota trekkt þegar verið var að hella bensíni eð a olíu á traktora.  Sveitabörnin lærðu margt framyfir borgarbörnin, en svo misstu þau líka af blaðaskiptunum fyrir utan Austubæjarbíó.  Það var nú gaman þegar verið var að býtta  á Roy Rogers eða Dell blöðum.  Blúndubínurnar voru stundum með Andrésar Andar blöð, en við alvöru trukkal....... við vorum með Dellblöðin.   Ég naut bæði sveita og borgarlífs.  Tel mig vera Rangæskan Reykvíking.  

Anna,  sagan þín skellti mér í algjört Nostalgíukast, ég ætla að skreppa í sólina hérna fyrir utan, með kaffibolla og ilja mér við æskuminningar.  Takk kærlega Anna mín.  Ég sendi þér tóninn áðan, heima hjá Bratti

[Edda Agnarsdóttir, 12.8.2007 kl. 14:01]

Anna, þú er óforbetranlegur krakki - og lætur þetta svo allt gossa núna!  Ég ætla sko að segja móðursystur þinni í Hólminum frá þessari frænku hennar sem gerir allt vitlaust á blogginu með bernskusögum úr sveitinni.

[Halldór Egill Guðnason, 12.8.2007 kl. 14:33]

Góð lesning. Það hefur semsagt verið vinsælla að pissa í Sinalco flösku en ég vissi

[Gíslína Erlendsdóttir, 12.8.2007 kl. 15:08]

Frábær lesning, man eftir ykkur við ýmsa undarleg iðju á æskuárum en þó sérstaklega Dritholti, það voru reyndar rúningsréttir í Dal og verið að smala girðinguna þegar maðurinn valdi þennan stað til að létta á sér, hann var nú alltaf dulítið spontant hann frændi okkar. Ætli sé ekki hægt að lika ykkar uppeldi við það að vera á mörkum sveitar og bæjar með Vegmót við hliðina.  Við vorum a.m.k. miklu saklausari en þið.

[bjarni (IP-tala skráð) 12.8.2007 kl. 16:13]

Eg man nu ekkert serstaklega eftir drullukokuatinu, en eg man eftir thvi einu sinni ad hafa verid platadur med sinalco trikkinu, en akvad bara ad snua vorn i sokn, klara allt saman og thykjast ekki taka eftir neinu :)

[Heiða B. Heiðars, 12.8.2007 kl. 16:23]

Nú er endanlega búið að eyðileggja fyrir mér minninguna um hvað Sinalco var gott.. skepnur

[Arnfinnur Bragason, 12.8.2007 kl. 16:28]

Fékkstu einhvern til að smakka Sinalcoið?

[Anna Einarsdóttir, 12.8.2007 kl. 16:29]

  Bjarni !  Þú hér.  Ertu virkilega búinn að gleyma kökunum mínum ? 

Hvernig er í útlandinu ?

[Anna Einarsdóttir, 12.8.2007 kl. 16:30]

Lestu komment númer 8 Arnfinnur.

[Arnfinnur Bragason, 12.8.2007 kl. 16:34]

Ái!!

[Ragnheiður , 12.8.2007 kl. 20:00]

hahaha þú hefur örugglega rekist á ættingja minn öðru hvoru í þessarri sveit.

[Anna Einarsdóttir, 12.8.2007 kl. 20:12]

Ó.... nú gýs upp mikil kvenleg forvitni hjá mér.... ættingja ? 

Kannski sendir þú mér póst ?

[bjarni (IP-tala skráð) 12.8.2007 kl. 20:47]

Bara mjog fint i utlandinu, kannski full mikill hiti en tha er bara ad fara i sjoinn og kaela sig adeins. Annars varst thad ekki thu sem platadir mig med sinalco trikkinu (skedi i lauagerdi), enda hefdi eg ekki treyst thvi ad drekka sinalco fra ther :)

[Katrín Snæhólm Baldursdóttir, 12.8.2007 kl. 21:03]

Anna Prakkari.....

Þú ert eins og gribba með sígó á bloggmyndinni þinni lítilli...en þegar maður stækkar hana ertu fegurðardrottning. Hvernig ferðu að þessu eiginlega???

[Anna Einarsdóttir, 12.8.2007 kl. 21:05]

Ég verð að játa það Bjarni að nú, 30 árum síðar, er farið að fenna í sporin og ég hreinlega man ekki hvort okkur tókst að plata einhvern eða ekki.  Man bara að við reyndum. 

[Anna Einarsdóttir, 12.8.2007 kl. 21:08]

Takk fyrir Katrín.    Gott að fá svona stroku. 

[Ragnheiður , 12.8.2007 kl. 21:29]

sé ekki mailið þitt hérna en mitt er [e-mail]