Saga fyrir svefninn.

14.6.2008 | 20:26

Regnið lamdi rúðurnar og vindurinn gnauðaði. Hómer hafði vafið sig inn í teppi í hlýrri stofunni. Hann hringaði sig í sófanum og horfði á hryllingsmynd í sjónvarpinu. Á glerborðinu stóð skál, full af nýjum ávöxtum. Hómer maulaði á appelsínu meðan hann horfði spenntur á myndina.

Myndin fjallaði um tvö systkini sem höfðu orðið viðskila við foreldra sína í Marokkó. Drengurinn var á tólfta ári og stúlkan, ljóshærð og fíngerð, var átta ára. Þau leiddust um þröngar göturnar og skimuðu örvæntingarfull eftir mömmu og pabba. Þrír langir dagar voru síðan foreldrarnir týndust. Skyndilega stökk maður í veg fyrir þau á þröngri götunni. Hann var hálftannlaus og á nefinu var stór graftarnabbi. Hann greip um handlegg stúlkunnar og dró hana inn í skuggalegt port. Bróðir hennar elti því systir hans var það eina sem hann átti í augnablikinu. Hann varð að passa hana. Maðurinn henti börnunum inn í búr og læsti dyrunum. Skelfingin skein úr augum þeirra og tárin streymdu niður kinnarnar. Sá tannlausi skipaði þeim að hætta þessu væli. Með hroka sagði hann þeim að hann hefði kaupanda að stúlkunni. Að ríkur maður í afskekktum fjallahéruðum hefði beðið hann að útvega unga ómótaða þjónustukonu. Einhverja sem myndi endast honum í þrjátíu ár. Sá tannlausi sneri sér síðan að drengnum og sagðist ætla honum annað og verra hlutskipti og svo hló hann um leið og hann smellti slepjulegum krumlum sínum á handarbak drengsins.

Hómer var orðið ómótt. Hann var einn heima og var alls ekki vanur að horfa á hryllingsmyndir. Hann henti af sér teppinu stóð upp og slökkti á sjónvarpinu.

homer_the_scream

Við fáum því aldrei að vita hvernig myndin endaði.

Flokkur: Spil og leikir | Breytt s.d. kl. 20:45 | Facebook

Athugasemdir

aulinn hann Hómer að slökkva svona á miðri mynd og við sitjum sársvekkt eftir...en flott nýja ópið!!

alva (IP-tala skráð) 14.6.2008 kl. 22:42

en samt græddu allir........

Hrönn Sigurðardóttir, 14.6.2008 kl. 22:59

Góð mynd

Þorsteinn Valur Baldvinsson, 15.6.2008 kl. 09:52

Ég verð að koma með smá athugasemd, - Sorry - EN, hvenær í ósköpunum hefur Hómer Simpson sést borða APPELS'INU !!?? Eða bara yfir höfuð ÁVEXTI !!???? - Ég man allavega ekki eftir að hafa séð það !

Kv, Hrabba

Hrabba (IP-tala skráð) 18.6.2008 kl. 10:30

Hrabba vinkona.

Hómer borðar ávexti í laumi. Hann er í raun ávaxtaismi. En það vita það fáir.

Anna Einarsdóttir, 18.6.2008 kl. 10:34

Ha ha ha - Það hlaut að vera !!!

Hrabba (IP-tala skráð) 18.6.2008 kl. 20:00

Bæta við athugasemd [Innskráning]

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Sparisjóður grínista og nágrennis.

Anna Einarsdóttir

Af gefnu tilefni skal það tekið fram, að allt sem ég skrái á þessa síðu er vel meint, þótt það á köflum geti hljómað eins og illa meint,, þá er það alls ekki þannig meint.