Hann stakk mig af.

 

 

Í gærkvöldi fór ég á Ljósanótt, eins og 39.999 aðrir.  Fór ein með sjálfri mér.  Af tónleikunum fannst mér þrír flytjendur mjög góðir...... Ljótu hálfvitarnir....... hljómsveit sem ég kæmist aldrei í, þar sem ég er hvorki ljót né hálfviti.......Jógvan og svo súperstjarnan Garðar Thor Cortes.  Hann er ótrúlega góður....alveg megagóður.   Reyndar varð ég fyrir truflun þegar hann var að syngja.  Fullorðinn maður kom og tók sér stöðu rétt hjá mér.  Ég tók eftir því að hann hélt um höfuðið og var að spá í hvort hann væri meiddur eða eitthvað.  Síðan fór hann að baða út öllum öngum.  Hann stjórnaði Garðari á köflum, klappaði saman höndunum, setti hendurnar upp eins og hann væri að ákalla himininn og svo brást það ekki að þegar hæstu tónarnir komu frá herra Cortes, þá greip maðurinn um höfuð sér..... svona eins og hann væri að reyna að ýta tónunum inn í kollinn...... því hærri tónar, því fastar þrýsti hann á hausinn.   Svo mikið handapat var um tíma á manninum að ég þurfti að færa mig, til að verða ekki lamin.  Þessi maður truflaði semsagt mig og alla aðra í kringum sig...... en samt var ekki annað hægt en að brosa.    Þvílík innlifun.

.

.

 

Klukkan hálfeitt, ákvað ég að nóg væri komið.  Fór í bílinn og hugsaði með mér að heimkoma yrði um tvöleytið.  Það fór þó ekki svo.  Um tvöleytið var ég við Grindavíkurafleggjara.... fjúff..... einnoghálfan tíma að keyra smáspöl.  Á Reykjanesbrautinni keyrði ég fram hjá gangandi vegfaranda, strák, sem virtist ætla að ganga til Reykjavíkur.  Svo hugsaði ég ekki meira um það...... nema 7-8 mínútum síðar, arkar strákur framúr mér........ og hverfur.     Það tók mig heilar 5 mínútur að ná honum aftur !  

 

Unga kynslóðin.

 

Fyrir tilviljun heyrði ég samtal tveggja drengja hérna úti:

.

Strákur A

-Ef ég væri í eyðimörk og það væri bara einn pollur, myndi ég pottþétt drekka hann allan.

Strákur B

- Ekki ef pollurinn væri rosalega stór !

.

Síðan hjóluðu þeir í burtu......

Miklar pælingar í gangi greinilega. 

.