Gleðileg jól !

 

Í hjarta mínu óska þess
að allir njóti jólanna.
Verið kát og voða hress
með vinsemd, ykkar Anna.

.

.

Kæru bloggvinir og aðrir vinir, gömlu sveitungar og nærsveitungar !

Fyrir hönd Sparisjóðs grínista og nágrennis, óska ég ykkur alls hins besta,

á morgun, hinn og á jólunum, á næsta ári og árunum þar á eftir.

Þessi ósk er verðtryggð, þannig að hún vex og vex... eins og magi um jólin.

Sérstakar jóla-jólakveðjur fá þeir bloggvinir sem ég kynntist persónulega á árinu.

Þau eiga það sameiginlegt að vera mikið öðlingsfólk.  Þau eru:

Ragnheiður, Brattur, Halldór, Björg, Ægir, Edda, Kristjana, Ingibjörg og Arnfinnur.

Helena !  Þig ætla ég að hitta á árinu 2008. 

.

Ef ég ætti eina jólaósk, myndi ég óska þess að Þórdís Tinna læknaðist. 

.

.

 

Mikið bull hefur runnið á bloggið á árinu....

Stefnt er að því að það verði enn meira á næsta ári !

Oh boy. 

 

 

Áramót eftir 11 daga !

.

Hér á bæ eru menn ekki aðeins komnir í jólaskap, heldur í áramótagírinn líka.

Mamma gamla var dyravörður hjá þessum sömu gaurum í fyrra... og dugði ein og sér til að halda uppi lögum og reglu.  Mætti halda að hún væri vöðvabúnt !  Nei, segi svona.     

Í ár ætlar hún hins vegar að láta fara vel um sig í sófanum heima um áramótin. 

En hún er stolt af afkvæminu. 

. 

.

Sól í stormi.

.

Á föstudaginn var, geisaði hér stormur og þá tók ég þessar myndir, allar á sömu mínútunni.

Það er stundum með ólíkindum hvað himininn getur verið skrautlegur.

.

 

.

 

.

.

.

Toppiði þetta !

 

Þá eru verðlaunin komin í hús. 

Nú misstuð þið af miklu !  Ekki bara, fékk ég bikar til eignar, fyrir að vinna mína eigin keppni, heldur fékk ég líka farandbikar sem er auðvitað nauðsynlegur til þess að hafa með í ferðalög, útilegur og svoleiðis.

Tveir bikarar, minna mátti það nú ekki vera enda er ég sannur Íslendingur og þarf alltaf að toppa sjálfa mig, nágrannana, fyrri árs gjörðir og hvaðeina. 

Til hamingju Ísland.... hér kem sko ég.     (var að semja þetta)  

.

Hundraðþúsund.

 

O.  Klaufi gat ég verið.  Gestur númer 100.000 átti að láta vita af sér og svo var allt í einu kominn 100.001 gestur. 

Ef einhver kannast við að hafa verið hundraðþúsundkallinn - eða hundraðþúsundkellingin, þá má sá/sú hinn/hin.... ohhh, þetta er flókið.... sami/sama, láta vita af sér.

Ef enginn gefur sig fram, má sá sem verður númer 100.100 hnippa í mig.

Ég veit ekki hvað gerist með þann heppna/óheppna..... er að hugsa....

Áskorun.

 

Verðlaun fær sá sem getur hlaupið svo hratt með ristaða brauðsneið, að ristið detti af.

.

.

 

Ég lagði mig og.....

 

.... vaknaði úfin og tætt

ekki var það nú svo sætt

ég reis upp við dogg

og skrifaði blogg

úti var tæplega stætt

og um það er núna rætt

að bloggið var ekki ágætt.

.

.

 

945 millibör.

 

Jæja....

Nú er ég búin að týna inn allt lausadót..... garðborðið (hvað heitir það annars... garðhúsgögn og garðstólar eru góð orð en borðið var bara úti og þá er það garðborðið).  Svo tók ég útijólaseríuna sem ég blogga um í þarsíðasta bloggi inn.  Ætla sko ekki að horfa á vinningsskreytinguna fjúka til nágrannans.  Ó nei. 

Þessar lægðir sem komu á mánudag og miðvikudag, brutu hér allt og brömluðu í Borgarnesi.  Hjólhýsi fór á hliðina á mánudaginn, rúður brotnuðu og stillansar hrundu.  Síðustu nótt fauk rútubíll á hliðina og rúður brotnuðu í a.m.k. 11 bílum, einhverjum húsum og ég svaf bara á mínu græna  eyra meðan allt þetta gerðist.  Svo varð ég alveg undrandi þegar ég keyrði í vinnuna og sá gám úti á miðri götu og stillansa í einni hrúgu á leiðinni.    Maður er svo saklaus eitthvað. 

En á morgun kemur aðallægðardruslan.... 945 millibör, sagt og skrifað, níuhundruðfjörutíuogfimm 00/100 -----------------------------

Ég er eins vel undirbúin og hægt er.... verslaði meira að segja inn eins og það væri að koma stríð.  Á matarbirgðir langt fram í næstu viku. 

Kjáninn sem maður getur nú verið !

Það er að byrja að fjúka í mig.

 

Nú er fokið í flest skjól !

 

Það er nefnilega farið að fjúka í mig oft í viku.

Á mánudaginn fauk alveg rosalega í mig. 

Ég finn að það er að byrja að fjúka í mig núna.

Og svo á eftir að fjúka alveg ofboðslega í mig á föstudaginn. 

Þeir spá því !

.

Ég held að þetta séu helvítis lægðirnar við Grænland.

.

Ps.... ekki kaupa neitt núna....

.... það er örugglega alveg fokdýrt. 

Dóttir mín kann að svara fyrir sig.

 

Dóttir mín, 11 ára, spurði mig nýlega hvenær hún ætti næst að fara til tannlæknis.

Ég:  "Viltu fara fyrir jól eða eigum við að geyma það, þar til í janúar"?

Hún:  "Ég vil frekar fara í janúar"

Ég:  "Viltu þá hjálpa mér að muna það" ?

Dóttir mín, alveg hneyksluð:  "Af hverju á ÉG að muna það"?

Ég:  "Af því að þetta eru þínar tennur"  (og mér fannst rökin óhrekjanleg, þar til ég heyrði næstu setningu hennar).

.

Hún sagði, án þess að hika:  "En ég er þitt barn" !! ...... og svo glotti hún í laumi.

------------------------------------------------------------------

Ég átti ekkert svar við þessu, enda hárrétt hjá henni og það kemur því í minn hlut að muna eftir tannlæknatíma í janúar.