Matreiðslumeistararnir Davíð og Jón Ásgeir.

 

I am back. 

Átti einn viðburðarríkasta mánuð ævi minnar sem innihélt yndislegar gleðistundir en einnig sorgarstundir.  Eignaðist frábæran mann en missti afskaplega góðhjartaðan og skemmtilegan tengdaföður.
 En svona er jú lífið...... blanda af gleði og sorg. 

--------------

Það var afar gott að sleppa við íslenskar fréttir í tvær vikur.  Íslenskar fréttir sem annars vegar eru "matreiddar" af Davíð Oddssyni og hins vegar af Jóni Ásgeiri.  Hvað hefur breyst á Íslandi ? 

Ég er ekki áskrifandi af Morgunblaðinu en les það endrum og eins.  Mér fannst föstudagsblaðið síðasta vera öðruvísi blað heldur en þau sem ég las fyrir mánuði.  Það var LITAÐ. 

Hvernig í veröldinni á íslensk alþjóð að geta myndað sér heilbrigðar skoðanir á stjórnmálunum meðan fréttir eru afbakaðar og matreiddar af stjórnmálaflokkum og útrásarvíkingum ofan í fólk ?

-------------

Tökum t.d. Icesave málið.  Þingmenn okkar eru sumir hverjir ekki að vinna að hag landsins eins og þeim ber.  Nei, þeir taka eigin vinsældir framyfir allt annað og segja ekki endilega sannleikann til að afla sér vinsældanna. 

Svona er minn skilningur á Icesave-málinu en það tók mig langan tíma að fá þennan skilning og hann varð ekki til í gegnum fjölmiðla;

Útrásarfíflin komu okkur í 1300 milljarða króna skuld á örfáum mánuðum.  Sjálfstæðismenn skrifuðu upp á það, fyrir u.þ.b. ári síðan, að við Íslendingar myndum greiða þessa skuld.  Síðan koma kosningar og ný ríkisstjórn.  Steingrímur og félagar ná að semja skuldina niður í ca. 600 milljarða, mínus einhverjar eignir gamla Landsbanka.  Alþingi samþykkir samninginn með ákveðnum fyrirvörum.  Meðal annars að greiðslubyrði sé aldrei meiri en 6% af hagvexti.  Þá er farið og rætt við Hollendinga/Breta.  Þeir fallast ekki á alla fyrirvarana og sérstaklega fer fyrir brjóstið á þeim fyrirvarinn um að ríkisábyrgð falli niður árið 2024.  Þeir spyrja sig;  "Munu ekki íslendingar sjá til þess að hagvöxtur sé 0% fram til ársins 2024 og þannig komast hjá því að greiða"?  Það er eðlilegt að þeir vilji tryggja sig því ríkissjóður þeirra hefur þegar greitt peningana út til fólksins, þ.e. Breta og Hollendinga.  Fyrirtæki og félagasamtök fengu ekkert. 

Nú er það þannig að Icesave gjaldfellur eftir 3 vikur.  Gjaldfalli það, skuldum við alla 1300 milljarðana.  Þá munu lánalínur lokast.  Hugsanlega enginn innflutningur, ekkert internet o.s.frv. 
Við verðum skv. mínum skilningi útskúfuð þjóð.

Nú skulum við fylgjast vel með þingmönnum okkar næstu vikurnar. 

Munu þeir velja leiðina;  1300 milljarða skuld, gjaldfallin strax + útskúfun úr alþjóðlegu samfélagi með tilheyrandi einangrun og kreppu ?  (því skuldin þeirra Landsbankamanna; Sigurjóns Þ. Árnasonar, Halldórs J. Kristjánssonar og Kjartans Gunnarssonar sem vill nú svo til að er einkavinur Davíðs Oddssonar, fer ekkert hvort sem okkur líkar betur eða verr)

Eða munu þeir velja leiðina;  600 milljarða skuld mínus eignir gamla Landsbanka + tími og tækifæri til að vinna þjóðina upp úr kreppunni + áframhaldandi samskipti við aðrar þjóðir + innflutningur á lyfjum, matvælum o.fl. ?

Hversu langt aftur í fortíð erum við tilbúin að fara ?

.

 

.

 

Athugasemdir

[Ragnheiður , 4.10.2009 kl. 12:26]

Knús Anna mín elskuleg og samúðarkveðjur til ykkar vegna tengdapabba.

[halkatla, 4.10.2009 kl. 13:18]

vá hvað þetta er flottur pistill

[Ingibjörg Friðriksdóttir, 5.10.2009 kl. 12:23]

Innilega til hamingju og einnig sendi ég ykkur samúðarkveðjur.. 

Ég geri undantekningu í þetta sinn og kommenta á Moggablogg.  Tilefnið er auðvitað þú...... sem ert eina nýgifta bloggvinkona mín.   Þú ert frábær, það hef ég lesið í gegn um öll þín skrif.  Það gleður mig að þú ætlir að vera smá óþekk, stríða manni og öðrum......

Ég opna ekki bloggið frekar en mbl.is. Les fréttir á visir og dv. ruv og stod 2. Einnig fer ég inn á NRK og Aftenposten sem ekki hafa séð ástæðu til að fjalla um blaðrið í sínum eigin Framsóknarmönnum frekar en „okkar“.

Ég fæ alltaf meldingu í gegn um tölvupóstinn minn ef einhver kommentar hjá mér og ég gat bara ekki látið undir höfuð leggjast að fara inn á Moggabloggið til að hitta þig fyrir og í bónus fékk ég líka þennan frábæra pistil þinn sem er talaður eins og út úr mínum munni.  Ég er að henda inn á Facebook hinu og þessu og það gleddi mig ef þú myndir adda mér.  Ingibjörg F. Ottesen.....

 Vonandi hafið þið það sem allra best og mér þætti nú við hæfi að taflvinafélag bloggara með tattú myndi  hittast og skála fyrir nýgiftum hjónum.......

Skál í boðinu..
--

[Anna Einarsdóttir, 5.10.2009 kl. 13:09]

Takk fyrir ljúfar athugasemdir. 

Í augnablikinu ætla ég að láta sem ég sjái ekki Davíð.... enda sé ég hann ekki.  Við getum þó verið sammála um að Davíð átti skilið að fá ráðningu.  Einhver hefur bara misskilið merkingu orðsins, held ég. 

Skákfélag bloggara með tattoo..... búið ykkur undir aðalfund. 

[Ingibjörg Friðriksdóttir, 7.10.2009 kl. 15:36]

Ég bíð í ofvæni...........

[Kristjana Bjarnadóttir, 7.10.2009 kl. 16:17]

Anna ég er ánægð með þig. Þetta er einmitt málið. Sorglegur populismi stjórnarandstöðunnar nær að rugla almenning í ríminu. Enn sorglegra er að þeim skuli með skjalli vera að takast að rugla stjórnarliða líka.

Er ekki hægt að ætlast til að þingmenn okkar hafi meðalgreind?

Samúðarkveðjur
Kristjana.

ps. ætlarðu að vera eða flytja?

[Anna Einarsdóttir, 7.10.2009 kl. 16:43]

Fyrst þegar ég heyrði um Davíð ritstjóra var ég ákveðin í að hætta hérna.  Svo fór ég að ígrunda og komst að þeirri niðurstöðu að mig langar mest til að STRÍÐA Davíð dálítið svo ég sit hér áfram um stund, a.m.k.