Öfundið mig bara.......

Þessi helgi innihélt:

ferðalag 

bridge

dans   

slökun

veislumat

bjór

frábæran félagsskap

hlátur 

 

Og nokkrir krakkar kíktu á gluggann sögðu:  "Það er eitthvað gamalt fólk að spila póker þarna"   Mér fannst það bara fyndið af því ég sat úti í horni og þau sáu mig ekki.  Annars hefðu þau sleppt orðinu "gamalt"  skiljiði.

 

Botna svo...

Góðan daginn mínir krúttilegu lesendur.

Nú geta Ísfirðingar og nærsveitamenn glaðst, því Annan kemur um helgina.  Hún er nefnilega ekki eins vitlaus og hún lítur út fyrir að vera.  Er í keppnisliði Vesturlands í kjördæmamóti í bridge.  Kann að dobla og allt.

Þar sem ég verð að heiman, vil ég biðja ykkur að sýna kurteisi um helgina og vera góð hvort við annað.  Kem hér með fyrripart og botniði nú:

Kanntu brauð að baka

og böggla saman vísu.......

Þegar ég kem heim aftur verður botninn í Borgarfirði.  Hmmm, er þá botninum náð ?

Það getur nú fokið í mann.

Ingibjörg Sólrún Gísladóttir er greind kona, heiðarleg, málefnaleg og hefur látið margt gott af sér leiða.  Hún er líka býsna myndarleg.  Það vefst ekki fyrir henni að taka á sig ábyrgð og hinir slyngustu stjórnmálamenn geta ekki rúllað yfir hana í rökræðum, enda hefur hún góðan málstað að verja.

Ég er komin með gubbupest  eftir að hafa lesið of margar athugasemdir sem innihalda orð sem ekki er hafandi eftir, níð um Ingibjörgu.  Skammist ykkar endalaust, þið sem ekkert hafið að gera annað en að rakka niður fólk.   Þið eruð ekkert annað en drulludelar.

Og ég vil ekki hafa það að þið kommentið á þessa færslu dónarnir ykkar, nema með fögrum lýsingarorðum !

Kát í dag.

Skoðið færsluna sem ég skrifa áður en ég fer í misheppnaða fýlukastið !  Geir var greinilega mjög brugðið.  Hann skellti sér í biðilsbuxurnar - hver selur annars biðilsbuxur ?  Og nú vill hann vera memm. Geir veit líka að ég gæti alveg tekið hann í bakaríið og gefið honum þar eitthvað á snúðinn og tekið hann svo í kleinu.  Geir er ekki vitlaus.  Hann er ekki tilbúinn að koma með mér í bakaríið.

Í gær fór ég á árshátíð GGT.   Ekkert smá gaman heldur stórskemmtilegt.  Hundur í óskilum var að skemmta.  Fyrir þá sem ekki vita neitt, þá er Hundur í óskilum ekki týndur hundur, heldur tveir menn sem spila á næstum öll hljóðfæri.  Þeir spiluðu nokkur lög og ég var farin að skammast mín fyrir sjálfa mig.  Ekki bara hló ég..... heldur grenjaði ég úr hlátri í tvær munnþurrkur - viðstöðulaust allan tímann sem þeir spiluðu.  Það er snilld að þykja lög svona fyndin.   Það sannast því enn og aftur;  ég hef laglegan húmor.

Fróðleiksfús.

Dóttir mín, 10 ára, er ein af þeim sem spyr um ALLT.  Hún komst ung að því að jólasveinninn væri ekki til í alvörunni.  Þetta fann hún sjálf út með því að deila 13 jólasveinum á öll heimili í landinu og niðurstaðan =  ekki fræðilegur að þeir kæmust yfir þetta allt saman á einni nóttu.  Hún spurði líka mikið um Guð þegar hún var yngri.  "Er Guð alls staðar" ?  Ég játti því.  "Og sér hann þá alla"  Jú jú.  "Líka Jórunni"?   Ja, stórt er spurt.

Þótt ég hafi skoðanir í pólitík, þá er ég vissulega ekki að dæla boðskapnum yfir börnin mín.  Hún varð þó vör við allar fréttirnar og í kjölfarið fékk ég ýmsar spurningar.  "Af hverju heldurðu með S núna" ?  "Var það ekki L síðast"?  Hárrétt hjá stelpu.  Í bæjarstjórnarkosningum var boðið fram sameiginlega, jafnaðarmenn, vinstri og óháðir undir nafni Borgarlista með bókstafinn L.  Skýr stelpa !  Svo vildi hún vita hvort Vinstri grænir væru þeir sem vildu engin álver og hvort Sjálfstæðismenn vildu setja álver alls staðar.

Jæja..... í gær kom hún svo heim úr skólanum með hjartalaga, rauða skál handa mér.  Afar vandaður gripur, enda stelpan handlagin eins og ömmurnar.  Eiginleiki sem hoppaði yfir mig.  Í dag tók ég skálina til að koma henni á sinn stað og þá sá ég dálítið skrifað í botninn á henni sem fékk mig til að brosa út að eyrum.  Í skálinni stóð:

XS

Fýlukastið mistókst.

Nenn´ekki að vera lengur í fýlu.  Þasso leiðinlegt. 

Góðan daginn.

Alveg að koma sumar og svona.

Þegar ég kom heim í nótt, voru hundurinn og kötturinn saman í sófanum, að horfa á bíómynd sem var stranglega bönnuð 16 ára og yngri.  Óþekktarangar !

 

Trú´ess´ekki.

Landsmenn kvittuðu í gær undir fleiri álver, stuðning við innrás í Írak, spillingu í stjórnkerfinu, óstöðugleika í efnahagslífinu, ójafnrétti osfrv. osfrv.  Og kjósendur bættu um betur og þökkuðu bara kærlega fyrir þetta.  ÓTRÚLEGT !

Ég er í fýlu.

Fer ekki aftur í gott skap nema Samfó fái að vera samfó Sjöllunum í næstu ríkisstjórn.   

Heyrirðu það Geir ! 

Fyrstu tölur !

Áður en þú kýst er vert að hafa í huga að:

Jón er kall.

Geir er kall.

Steingrímur J. er kall

Ingibjörg Sólrún er kona

Guðjón Arnar er kall

Ómar Ragnarsson er kall

Þar sem við erum fremst á merinni, hvað jafnréttissjónarmið varðar, er ljóst að úrslit fara sem hér segir:

Jón Sig. 10%

Geir       10%

Steingrímur J.  10%

Ingibjörg Sólrún 50%

Guðjón Arnar 10%

Ómar 10%

Svo vil ég bara fyrir mínar hendur báðar, þakka fyrir ferlega skemmtilega kosningabaráttu.

 

 

Bara eitt enn.......

 

X-S og koma svo.

 

Hagur minn vænkaðist.

Það er alltaf verið að tala um Kaffibandalagið.  Ég veit sko alveg hverjir eru í því.  Framsókn !  Þeir eru ennþá að gefa sömu kaffipakkana og þeir gáfu fyrir 8 árum.  Hafa greinilega ekki fattað þá hvað þeir áttu fáa aðdáendur og pantað alltof stórt upplag.  En nú verð ég að játa á mig mikla skömm.   Fyrir átta árum var ég ung og vitlaus.  Altså ung miðað við Halldór Ásgríms og vitlaus miðað við Albert Einstein.  Í kosningunum fyrir átta árum vissi ég ekki hvað ég ætti að kjósa.  Rétt fyrir kosningar kom til mín frambjóðandi frá Framsókn.  Hann lofaði mér barnaskattkortum og kaffipakka ef ég setti X við bé.  Kaffipakkann afhenti hann mér strax en barnaskattkortin hef ég ekki séð ennþá.  Því er ég farin að hallast að því að ég hafi kosið einn lítinn kaffipakka.  Er hægt að vera vitlausari ?  Fyrir þetta hef ég skammast mín í átta ár.  Í dag fékk ég örlitla uppreisn æru.  Ég hitti frambjóðanda Framsóknar þar sem hann var að útdeila þessu hundgamla kaffi og gerði mér lítið fyrir og hirti af honum einn lítinn kaffipakka.  Það er þó skömminni skárra að hafa kosið tvo kaffipakka heldur en einn.